Poet :Ahmed Faraz

us ko juda hue bhi zamaana bahut hua
ab kya kahein ye qissa puraana bahut hua

dhalti na thi kisi bhi jatan se shab-e-firaq
ai marge nagahaan tira aana bahut hua

hum khald se nikal to gaye hain par ai khuda
itne se waqie ka fasana bahut hua

ab hum hain aur saare zamaane ki dushmani
us se zara sa rabt badhaana bahut hua

ab kyun na zindagi pe mohabbat ko vaar den
is aashiqi mein jaan se jaana bahut hua

ab tak to dil ka dil se taaruf na ho saka
maana ki us se milna milaana bahut hua

kya kya na hum kharab hue hain magar ye dil
ai yaad-e-yaar tera thikaana bahut hua

kehta tha naasehon se mere munh na aaiyo
phir kya tha ek huu ka bahaana bahut hua

lo phir tire labon pe usi bewafa ka zikr
ahmad-‘faraz tujh se kaha na bahut hua

اس کو جدا ہوئے بھی زمانہ بہت ہوا
اب کیا کہیں یہ قصہ پرانا بہت ہوا

ڈھلتی نہ تھی کسی بھی جتن سے شب فراق
اے مرگ ناگہاں ترا آنا بہت ہوا

ہم خلد سے نکل تو گئے ہیں پر اے خدا
اتنے سے واقعے کا فسانہ بہت ہوا

اب ہم ہیں اور سارے زمانے کی دشمنی
اس سے ذرا سا ربط بڑھانا بہت ہوا

اب کیوں نہ زندگی پہ محبت کو وار دیں
اس عاشقی میں جان سے جانا بہت ہوا

اب تک تو دل کا دل سے تعارف نہ ہو سکا
مانا کہ اس سے ملنا ملانا بہت ہوا

کیا کیا نہ ہم خراب ہوئے ہیں مگر یہ دل
اے یاد یار تیرا ٹھکانہ بہت ہوا

کہتا تھا ناصحوں سے مرے منہ نہ آئیو
پھر کیا تھا ایک ہو کا بہانہ بہت ہوا

لو پھر ترے لبوں پہ اسی بے وفا کا ذکر
احمد فرازؔ تجھ سے کہا نہ بہت ہوا