Gham ki barish ne bhi tere naqsh ko dhoya nahi,
Tu ne mujh ko kho diya, main ne tujhe khoya nahi.

Neend ka halka gulabi sa khumaar aankhon mein tha,
Yoon laga jaise woh raat ko der tak soya nahi.

Har taraf deewar o dar aur un mein aankhon ka hujoom,
Keh sake jo dil ki haalat woh lab goya nahi.

Jurm Adam ne kiya aur nasal Adam ko saza,
Kaatta hoon zindagi bhar maine jo boya nahi.

Janta hoon ek aise shakhs ko mein bhi Muneer,
Gham se patthar ho gaya lekin kabhi roya nahi.